'A Missa

‘A Duminica tanti andamu a Missa
ma ‘menzu e banchi mai ‘ndi ricugghiemu,
sciaminati tutti quanti stamu
chi mancu li saluti ‘ndi facemu.

A diri ‘a verità non videmu l’ura
lu parrinu mi faci la chiusura,
stamu comu a chiddi supra ‘i spini
pinsandu ‘u manciari, la pattita e li lupini.

L’aspettu ieni seriu, li funci: un metru e ‘menzu
e tantu pi’ gradiri c’è ‘a puzza dill’incensu.
Ci manca puru ‘a predica chi non finisci mai
e chiddu avanti ‘i tia chi parra di so guai.

‘Ndi strincemu poi li mani senza capiri nenti,
ma basta chi u facemu e chi mustramu ‘i denti.
Chi facci scuri scuri, ‘ndi mittemu ‘nfila
'i mani sunnu ‘giunti, ma li causi: vecchia tila!

© Francesco

Senza 'mmucciari

A cosa chi fra amici non suppottu
ieni mucciari ‘a pura virità.
Mi veni ‘nta testa di bottu
quando scopru la malignità.

Chi ‘ndi custa mi veni ‘i pinsari,
picchi avemu sempre a’mbrugghiari?
Non fussi cchiù normali parrari,
apettamenti, senza ‘mmucciari?

Amicizia voli diri proprio chistu:
diri li cosi papali papali
occhi ‘nta l’occhi senza lu mali.


© Francesco

Malincunia

Ogni tantu mi pigghia ‘a malincunia
mi sentu stranu, ma lacrima di puisia.
Mi vidu ‘ncucciatu a pedi di la cruci
e vidu Gesù, la mani, ‘na carizza duci.

Li lacrimi scindunu chianu chianu,
un omu chi cianci, pari stranu,
‘nta l’occhji mi vadda mi mugghieri:
mi ridi, già canusci 'i me pinseri.


© Francesco

Pi' n'amica

L’amicizia è quantu l’omu antica
e intra ‘i cori idda sempri reca
la gioia, l’alligria, i peni o guai
e jò su cuntentu pi’ n’amica,
la vidu tranquilla e allegra
e cettamenti cchiù sicura assai.
L’amicizia è porgiri lu cori cu' li mani
e non mustrari i denti e poi si cani, /1/
e chistu ‘ndu ‘nsigna puru Gesù Cristu
e nuddu può diri: no sacciu, non l’è vistu!





----------------------------------------------
1/ e poi si cani = e poi la cattiveria

© Francesco