Amicu veru

‘Ncuntrai a me "cucinu"

‘mbriacheddu di vinu,

‘na mani a nu canceddu

e un ciauru supraffinu

di vomitu facia,

la bucca: di lurdia.

La testa mi firria,

megghiu ‘na malatia

ca stu fattu mi sapia:

lu primu di li pinseri,

poi i fighi ‘a mugghieri,

cca su cosi seri:

di dutturi, d’infimmeri,

cca su cosi seri.

Poi la menti si iaprivu,

un’idea cumparivu:

tralasciari ‘i cumpitenti,

scappari undi parenti.

Tutti quanti ‘ntirissai,

‘mpaci a nuddu jò lassai,

ma ‘a cosa ‘ntilligenti,

e vu dicu sorridenti,

chi ‘nginocchiu jò mi misi:

du Signuri mi fidai.

Mancu i robi fici lisi

chi niscivu dintra ‘i guai.

Grazii a Diu veramenti,

grazii a Diu ‘i tuttu ‘ cori.

Lu ‘ncuntrai novamenti,

nenti vinu e mali odori,

dill’aspettu cchiù pussenti

e ‘nta facci cchiù lucenti.